------------------------------------------------------------------------------------
Tukk Hirs o Hawas ko chorr mian, matt dais b'dais phiray mara
Qazzaq ajal ka lootay hai din raat baja kar naqara
kia badhia, bhainsa, bael, shutar kia goonain pilla sir bhara
kia gaihoun, chawal, moth, mattar, kia aag, dhuwan aur angara
Sub thaath parra reh jaway ga jab laad chalay ga banjara
Too bhadiya laday bail bharay jo poorab pacham jaway ga
Ya sood bharra kar laday ga ya toota ghata paway ga
Qazaq ajal ka rastay main jab bhala maar giraway ga
Dhan dolat naati pota kia ik kunba kaam na away ga
Sub thaath parra reh jaway ga jab laad chalay ga banjara
Jab chaltay chaltay rastay main ye goan teri reh jaway gi
Ik badhiya teri mitti par ghas na charnay paway gi
Yeh khaep jo too nay ladi hai sub hissoun main batt jaway gi
Dhi, Poot, jamai, beta kia, banjaran pas na away gi
Sub thaath parra reh jaway ga jab laad chalay ga banjara
Yeh khaep bharay jo jaata , yeh khaep mian mat gin apni
Ab koi gharri pal sa'at main yeh khaep badan ki hai kafni
Kia thaal katouri chandi ki kia peetal ki dibya dhakni
Kia bartan sonay chandi kay kia mitti ki handiya chapni
Sub thaath parra reh jaway ga jab laad chalay ga banjara
Yeh Dhoom dharakka saath liyay kiyun phirta hai jangal jangal
Ik tinka saath na jaway ga mo'qoof huwa jab ann aur jall
Ghar baar atari chopaari kia khasa, nain sukh aur mall mall
kia chilman parday farsh naey kia lal palang aur rang mahal
Sub thaath parra reh jaway ga jab laad chalay ga banjara
Kuch kaam na away ga tairay yeh la'lo zamurd saim o zarr
Jab poonji baat main bikhray gi harr aan banay gi jaan oopar
Noubat, naqaray, baan, nishan, dolat, hashmat, foujain lashkar
Kia masnad, takia, malk makan, kia chouki, kursi, takht, chattar
Sub thaath parra reh jaway ga jab laad chalay ga banjara
Kyun ji par bojh uthata hai in gonoan bhari bhari kay
Jab moat ka dera aan parra phir doonay hain byupari kay
Kia saz jurrao, zarr zaiwar kia gotay thaan kinari kay
Kia ghorray zain sunehri kay kia hathi lal anbaari kay
Sub thaath parra reh jaway ga jab laad chalay ga banjara
Maghroor na ho talwaroun par, mat bhool bharosay dhaaloun kay
Sub patta tour kay bhagain gay munh daikh ajal kay bhaloun kay
Kia dabbay mooti heeroun kay kia dhair khazanay maaloun kay
Kia buqchay taash, mushajjar kay kia takhtay shaal doshaloun kay
Sub thaath parra reh jaway ga jab laad chalay ga banjara
Kia sakht makaan banwaata hai Khumbb tairay tann ka hai poala
Too oonchay koat uthaata hai, waan ghoar gharray nay mouhn khola
Kia raini, khandaq, randd barray, kia burj, kangoora anmola
Garrh, koat, rahkalaa, kal'aa, kia sheesha daroo aur gola
Sub thaath parra reh jaway ga jab laad chalay ga banjara
Har aan nafa aur tootay main kyun marta phirta hai bann bann
tuk ghaafil dil main soch zara hai sath laga teray dushman
Kia loundi, baandi, daee, didda kia bandaa chaila naik chalan
Kia masjid mandir, taal, kuwaan kia khaiti barri phool chaman
Sub thaath parra reh jaway ga jab laad chalay ga banjara
Jab marg phiraa kar chabuk ko yeh bael badan ka haankay ga
Koi taaj samaitay ga tera koi goan sieay aur taankay ga
Ho dhair akaela jungle main too khaak lehaid ki phaankay ga
Us jangle main phir aah nazeer ik tinkaa aan na jhaankay ga
Sub thaath parra reh jaway ga jab laad chalay ga banjara
No comments:
Post a Comment